Эрхэм хүндэт эрдэмтэн багш нар, зочид төлөөлөгчдөө.

 ХИС-ийн 45 жилийн Ойд зориулсан эрдэм шинжилгээний хурлын индрээс та бүхэнд ойн баярын мэндчилгээг дэвшүүлье. АҮ-ийн 4-р хувьсгалын эринд, АҮ-ийн дараагийн 5-р хувьсгал  хаалга тогшиж буй энэ үед бид сургуулийнхаа Ойд зориулсан  энэ хурлыг “Дижитал үе дэх салбар дундын судалгаа” гэж нэрлэсэн нь гүн утга учиртай юм. Өнөөдөр “технологи нь хүмүүнлэгийн ухаантай ураг барилдаж байж сая хүний зүрх сэтгэлд хүрнэ” гэсэн Стив Жобсын үг бодит биеллээ олж байна. ХИС-ийн эрдмийн хамт олон ч цаг үеийн энэхүү дуудлагыг хүлээн авч хүмүүнлэгийн болон нийгмийн ухааны солбицол дээр орчин үеийн өндөр технологи, хиймэл оюуны хэрэглээг чухалчилсан нэн ирээдүйтэй энэ чиглэлийн хүрээнд хурлыг хийж байна. 

         Энэхүү хуралд манай үндэсний тэргүүлэх их сургуулиуд, шинжлэх ухааны байгууллага болон хамтран ажилладаг гадаадын их сургуулиудын эрдэмтэд уригдан оролцож байгааг хэлэхэд таатай байна. ХИС-ийн эрдэмтэн багш нар нь хүмүүнлэгийн ба нийгмийн шинжлэх ухааны салбарт, тухайлбал, компьютерын хэл шинжлэл, нейро сэтгэл судлал, бизнесийн болон олон улс судлалын салбар дундын чиглэлээр дижитал технологийн хэрэглээтэй холбосон судалгааг хийж үр дүнг олон улсын өндөр эрэмбийн сэтгүүлүүдэд хэвлүүлж байна. ХИС нь цаашид ч бусад их сургуулиуд, судалгааны байгууллагуудын мэргэжил нэгт нөхөдтэйгөө хамтын үйл ажиллагаагаа улам өргөжүүлж, салбар дундын судалгааны ирээдүйтэй чиглэлийг эх орондоо хэрэгжүүлэх хүсэл тэмүүлэлтэй ажиллаж байгааг онцлон хэлэхэд таатай байна.

 

​Хурлын үйл ажиллагаанд амжилт хүсье.